وطنك مناعتك


بثينة حمدان

 

الحكومة قالت #فش_طلعة وانضبوا بالبيت

ما قالت أكل فش، ما قالت دواء فش، ما قالت خبز فش

فشة تفش العدوين زيهم ما فش.

هذا مرض

هذا وباء

هذا داااء ولسا ما وصل الدواء.

 

اوعوا تفكروا شورها من راسها

أوعوا تفكروا قرارها سهل

اوعوا تفكروا مافي خسائر مافي ديون!!!

شورها من راسها وقلبها لفلسطين الي طول عمرها قوية وعصية وأبية.

 

تحت الكورونا عرفنا مين الصادق ومين الكذاب

مين الطيب ومين الغشّاش،

حتى مين الحامل للفيروس ومين المصاب

مين تحت الحجر ومين تحت القناع!

تحت الكورونا عرفنا مين ابن البلد ومين البياع

مين المسؤول ومين السواح

مين المتسول ومين الشحااد

مين المواطن ومين الهشّات؟

 

عيدوا حساباتكم

شوفوا بيوتكم

شوفوا اولادكم وابوكم وامكم واخوتكم!

الناس قربت تنسى بعض

بس الحجر رح يرجعها لبعض.

 

الكورونا مش عيب

المرض مش عيب

الحجر والعزل مش عيب يا ناس مش عيب

القعدة في البيت لا هي عيب ولا حرام!

نسيتوا

نسيتوا الاجتياحات ومنع التجول ونحن نلعب شدة عالدرج

نسيتوا القصف ونحن نضحك ونوكل بزر عالدرج

اه درج العمارة كان الملجأ وصاروخ المحتل ما إله ملجأ.. نسيتوا!

 

ارفع راسك لأنك فلسطيني وقد التحدي

ارفع راسك لأنه مسيرتك وطنية

وأرضك مغمسة بريحة المسك وقوية بشجر الزيتون والزعتر والميرمية.

ارفع راسك لأنه وطنك مناعتك

والعزيمة والارادة أسلحتك.

وما تنسى الي عند السجان المحتل:

أسرانا وأسيراتنا

كلهم واقفين ومش سائلين ومواصلين المشوار

لا فارق معهم احتلال ولا قضبان.

 

فش طلعة عشان ولادنا يعيشوا

فش طلعة عشان الحج والحجة يظل بيتهم عامر ويصيحوا

فش طلعة عشان ضعاف المناعة اصحابنا وحبابنا يعيشوا

فش طلعة عشان البلد وأهلها يعيشوا

فش طلعة عشان تخلص هالأزمة ونعيش ونتذكر

وياما نتذكر!!!

 

وطنك مناعتك

فيديو: https://www.youtube.com/watch?v=cI7qBvXFM5Y

 





طباعة الصفحة

تم بواسطة : amjad 2020-03-24 04:19:42
التعليقات

  ملاحظة: التعليقات تعكس آراء كتابها ولا تعكس آراء الموقع.

 

 

اخبار سريعة

Loading...